qaşların çatmadır

Qaşların çatmadır arası yoxdur,
Deyme üreğime yarası çoxdur.
Dodağın qaymaqdır, dilin bal, ancaq,
Acı sözlerinse xençeldir oxdur.

Saçlarını qısa kesme amandır!
Üreğimin Ke'besine talandır.
Reqibim Quran'dan köynek geyse de,
Onun sözüne inanma, yalandır.

Uçmağın qoxusu: bir cüt şamama,
Gönlüm çeker ise meni qınama.
Ürek odunu gözyaşı söndürmür,
Lütfen ayrılıqla meni sınama!

Deyirem gel bu bağı birge gezek,
Lap bu axşam üstü, reqibden uzaq,
Birge qara saçın gizemin çözek,
Ağ üzünle gecenin bağrın üzek.

Bir ömür eyledin naz ile qemze,
Buyur teşrif getir bir gece bize,
Yolunu süpürüm kipriklerimle,
Gözyaşım ile su sepim dehlize.

Mene yazılmamış o naz ağacı,
Dadmışam meyvesin, acıdır acı.
Bir ömür varlığa amac aradım,
Bulmuşam, gerçeyi: yoxdur amacı.

Çaxırcının qapısında dexilem.
Sövseler qovsalar geden deyilem.
Her neyim varıydı ona vermişem,
Çaxır almışam men, sanma sefilem!

Çaxırın çaxmağı beynime vurur...
Sağ olsun çaxırcı, sudan od qurur!
Od düşür canıma elovlanıram,
Tütürem qalxıram, su yerde durur.

Çaxırın oduylan esredim durdum,
Esredikce usu çaxırda buldum.
Usun çerçivesin görüb sıxıldım,
Evrenin işine ağladım güldüm...

Baxıram, sanıram baxırsın mene,
Yahaldım, deyilem men, baxan sene!
Bilmeden girmişem güzgüxanaya...
Her yerden görüntü görünür gene...

Gözlerim yanqıdan qamaşmış bir an,
Güzgüden qalxırdı ışıqdan duman...
Seni men güzgüde mi gördüm? söyle!
Yoxsa qalxmışmıydı Oğuz aradan?

Baxmadan, güzgüden gördüm, bilindi...
Sezmekde yalnız mı qaldım men indi?
Yalnızsam, gene de çaxırı verin!
Belke üreğimin yanqını dindi.

Kim sundu çaxırı lütfen söyleyin!
Men mi sundum yoxsa? Ne oldu deyin!
Hem sundum, hem içdim, hem çaxır oldum,
Her üçü bir oldu men ile yeqin!

Son qoşuğumu qumlara yazsınlar,
Böyük suyun qıyısına alsınlar,
Qoy dalqalar onu menimsesinler,
Derine götürüb biraz sinsinler.

Oğuz Türk
2015

قاشلارين چاتمادير، آراسي يوخدور

ده يمه اوره گيمه، ياراسي چوخدور

دوداغين قايماقدير، ديلين بال، آنجاق

آجي سوزله رينسه، خه نچه لدير اوخدور

ساچلاريني قيسا كه سمه، آماندير

اوره گيمين 'كعبه' سينه تالاندير

رقيبيم 'قران'دان كوينه ك ده گئيسه
اونون سوزونه اينانما، يالاندير

اوچماغين قوخوسو: بير جؤت شاماما

گونلوم چه كه ر ايسه، مه ني قيناما

اوره ك اودونو گوز ياشي سوندورمور

!لوتفه ن آيريليقلا مه ني سيناما

دئييره م: گه ل بو باغي بيرگه گه زه ك

لاپ بو آخشام اوستو، رقيبده ن اوزاق

بيرگه قارا ساچين گيزه مين چوزه ك

آغ اوزونله گئجه نين باغرين اوزه ك

بير عومور ائيله دين نازيله قه مزه

بويور تشريف گه تير بير گئجه بيزه

يولونو سوپوروم كيپريكله ريمله

گوز ياشيم ايله سو سه پيم ده هليزه

مه نه يازيلماميش او ناز آغاجي

دادميشام مئيوه سين، آجيدير آجي

بير عومور وارليغا آماج آراديم

بولموشام گه رچه يي: يوخدور آماجي

چاخيرجينين قاپيسيندا ده خيله م

سووسه له ر قووسالار گئده ن دئييله م

هه ر نه ييم وارييدي اونا وئرميشه م

چاخير آلميشام مه ن، سانما سه فيله م

چاخيرين چاخماغي بئينيمه وورور

ساغ اولسون چاخيرجي، سودان اود قورور

اود دوشور جانيما اه لوولانيرام

تؤتؤره م قالخيرام، سو يئرده دورور

چاخيرين اودويلا اه سره ديم دوردوم

اسره ديكجه اوسو چاخيردا بولدوم

اوسون چه رچيوه سين گوردوم سيخيلديم

اه وره نين ايشينه آغلاديم گولدوم

باخيرام، سانيرام باخيرسين مه نه

ياهالديم، دئيله م مه ن، باخان سه نه

بيلمه ده ن گيرميشه م گؤزگؤخانايا

هه ر يئرده ن گورونتو گورونور گئنه

گؤزله ريم يانقيدان قاماشميش بير آن

گؤزگؤده ن ايشيقدان قالخيردي دومان

سه ني مه ن گؤزگؤده مي گوردوم؟ سويله

يوخسا قالخميش مييدي اوغوز آرادان؟

باخمادان، گؤزگؤده ن گوردوم، بيليندي

 سه زمه كده يالنيز مي قالديم مه ن ايندي؟

!يالنيزسام، گئنه ده چاخيري وئرين

...بلكه اوره گيمين يانقيني ديندي

!كيم سوندو چاخيري؟ لوتفه ن سويله يين

!مه ن مي سوندوم يوخسا؟ نه اولدو؟ دئيين

هه م سوندوم، هه م ايچديم، هه م چاخير اولدوم

.هه ر اؤچو بير اولدو مه ن ايله يه قين

!سون قوشوغومو قوملارا يازسينلار

!بويوك سويون قيييسينا آلسينلار

!قوي دالقالار اونو مه نيمسه سينله ر

!ده رينه گوتوروب، بيراز سينسينله ر

اوغوز تورك

٢٠١٥