Qırmızı Paltarlıq

Qırmızı Paltarlıq,

Gözlerindendir bizim bimarlıq,
Qaşlarındandır bizim efkarlıq.

On min il ağız açıb söz etmedin,
Bu ne oruc? Bu ne perhizkarlıq?

Eymedin qaş, yıxmadın kipriğini,
Nece etdin bunca efsunkarlıq?

Meni burda buraxıb getdin hemen,
Bu mu yoldaşlıq? Bu mudur yarlıq?

Bir ömür sürgünde qaldım, bilmedim,
Niye menden eyledin bizarlıq.

Savalan'dan biz uyurken getmisin,
Vermeden heç bize xeberdarlıq.

Men Sehend'ın zirvesinde gözlürem...
Kesmişik qurban, buyur xunxarlıq.

Bez qalasından qanın qoxusun al,
Qanla etdik "Qırmızı Paltarlıq".

Terse tutsaqda çürüdüm boş yere,
İşte Mensur! Eyleyin berdarlıq!

Nuqteden çıxdıqda düz gedemedik,
Çizgiden öte durur pergarlıq.

Men çaxır denizinin qevvasıyam,
Esrek iken inci buldum karlıq;

Sözden anlamdan öte geçdim bir an,
Yoxluğun içinde buldum varlıq.

Yoxluğun ucun bucağın görmedim,
Varlıq edir orda perdedarlıq.

Özümü yedim çürütdüm varlığı,
Varlığın sofrasıdır mürdarlıq.

Ava çıkdıq avlanıb düşdük hemen,
Düşgünü qaldır ele dildarlıq.

Qoynuna al uçmağa eyle qonaq,
Bundan artıq eyleme eyyarlıq.

Biz senin adını yaydıq dünyada,
Sen de bir yol eyle terefdarlıq.

Sezmeye bir an açıldı pencere,
Bir iki gün oldu berxurdarlıq...

Yoxluğun bağrında gedirem yatam...
Heç oyatma, sevmirem bidarlıq.

Ölümün üstüne içgiyle gelin,
Men ölüm heç etmeyin qemxarlıq.

Yox mu çıxış yolu bu qasırqadan?
Oğuz'un gönlün sıxır bu varlıq...

Oğuz Türk
2015

قيرميزي پالتارليق

گوز له رينده ندير بيزيم بيمارليق

قاشلارينداندير بيزيم افكارليق

اون مين ايل آغيز آچيب سؤز ائتمه دين

بو نه اوروج بو نه پرهيزكارليق؟

ائيمه دين قاش ييخمادين كيپريگيني

نئجه ائتدين بونجا افسونكارليق؟

مه ني بوردا بوراخيب گئتدين هه مه ن

بو مو يولداشليق بو مودور يارليق؟

بير عومور سورگونده قالديم، بيلمه ديم

نييه مه نده ن ائيله دين بيزارليق

ساوالاندان بيز اويوركه ن گئتميسين

وئرمه ده ن هيچ بيزه خبردارليق

مه ن سه هه ندين زيروه سينده گوزلوره م

كه سميشيك قوربان بويور خونخارليق

به ز قالاسيندان قانين قوخوسون آل

قانلا ائتديك "قيرميزي پالتارليق" 

ته رسه توتساقدا چورودوم بوش يئره

ايشته منصور! ائيله يين بردارليق

نقطه ده ن چيخديقدا دوز گئده مه ديك

چيزگي ده ن اؤته دورور پرگارليق

مه ن چاخير ده نيزينين غواصي يام

اه سره ك ايكه ن اينجي بولدوم كارليق

سؤزده ن آنلامدان اؤته گئچديم بير آن

يوخلوغون ايچينده بولدوم وارليق

يوخلوغون اوجون بوجاغين گؤرمه ديم

وارليق ائتدي اوردا پرده دارليق

اؤزومو يئديم چوروتدوم وارليغي

وارليغين سوفرا سيدير موردارليق

آوا چيخديق آولانيب دوشدوك هه مه ن

دوشگونو قالدير ائله ديلدارليق

قوينونا آل اوچماغا ائيله قوناق

بوندان آرتيق ائيله مه عيارليق

بيز سه نين آديني يايديق دونيادا

سه ن ده بير يول ائيله طرفدارليق

سه زمه يه بير آن آچيلدي پنجره

بير ايكي گون اولدو برخوردارليق

يوخلوغون باغريندا گئديره م ياتام

هيچ اوياتما سئوميره م بيدارليق

اؤلؤمؤن اوستونه ايچگي له ن گه لين

مه ن اؤلؤم هيچ ائتمه يين غمخارليق

يوخ مو چيخيش يولو بو قاسيرقادان؟

اوغوزون گونلون سيخير بو وارليق

اوغوز تورك ٢٠١٥