İran düşüncesi ve Azerbaycan düşüncesi, ...

İran düşüncesi ve Azerbaycan düşüncesi, ...

Yazılarımızda ''İran düşüncesi'' ve ''Azerbaycan düşüncesi'' qonusunu açıxlamışıq. Ancaq ''İran düşüncesi'' dediğimizde neyi qesd edirik? İndi, Azerbaycan düşüncesi İran düşüncesi ile var yox savaşındadır. Biz ise bu savaşın Güney Azerbaycan qolundayıq. İran düşüncesi Azerbaycan düşüncesini yox etme çabasında Güney Azerbaycan'ı ayağı altına salıb ezmekdedir. İşqal altında can çekişinde olan ve sürünen Güney Azerbaycan Türk milleti, topraqsal ve toplumsal varlığından yoxsunlaşmaqdadır. Geçen 20 ilde dalqanın bizim yönümüze dağişdiği doğrudur. Ancaq, İran düşüncesi de Güney Azerbaycan'ın qurtuluşunda ve Böyük Azerbaycan'ın yaranmasında, öz yoxluğunu görür. Buna göre de aşırı ve ağır İran-Fars milletçiliğine sövkenir. Bu İran-Fars milletçiliği hemen hemen ırqçılıqdır. Neden ki İran-Fars milletçiliği başqa milletlerin gelişmesine ve hetta varlığına bir tepgi kimindir. Ancaq bu bir sağlıqlı milletçilik değildir. Yoxedicidir. Hem İran-Fars varlığına, hem de başqa milletlere, Türk'lere Ereb'lere, vb... yoxedicidir. Ancaq Güney Azerbaycan Türk milletçiliği ve genelde Böyük Azerbaycan Türk milletçiliği heç bir millete tepgi olaraq yaranmamışdır. Bu milletçilik yıxıcı ve yoxedici değildir. Ancaq qurtarıcı ve tikici (inşa edici)dir.
Önceden vurquladığımız kimin, düşüncemizce, bizim milletçiliğimiz, tepgisel değil, etgiseldir. Hetta İran işqalına qarşı qoyub qurtuluş savaşında, tepgisellik kimin görünen (tecziye teleblik) gerçekde, etgisel olaraq (istiqlalçıllıq)dır. Bu daha ince bir qonudur. Demek, bizim milletçiliğimiz, ne Fars'ların milletine qarşı ne de onların topraqlarında gözümüz var diye, sanılmamalıdır. Ancaq, bizim milletçiliğimiz, Türk'ü öz topraqlarında gerçek anlamı ile var eden bir düşüncedir. İndi Türk'lerin Azerbaycan'a gelib gelmemesi veya ne zaman gelmesi, ve bilekis, Fars'ların o bölgede varlıqlarının ''neandırtal''lara qeder dayanması, veya Türk dilinin ne qeder yüksek derecede olub olmaması, ve Fars dilinin ne düzeyde olub olmaması, heç bir şeyi değişdiremez. Demek, Güney Azerbaycan Türk varlığının var yox savaşında, öz bağımsızlığını elde etme yolunda, bu davanı ne daha çox haqlı veya daha az haqlı edemez. Nece ki, Güney Azerbaycan Türk millet, bağımsızlığı özüne bir milli haq bilirse, ve özünde özünü idare etme leyaqetini görürse, kimse ve heç bir şey onu daha haqlı veya haqsız edemez. Bu haq, Güney Azerbaycan Türkünün isteğinden doğula bilir. Ne tarixden, ne de geleceğe yöneli varsayılardan. ''Milli istek'', özü özüne ve özü özünde haq doğurandır. Yalnız ''istek''dir ki milli varlıq yarada biler. Millet olmaq da bu istekdedir. Milli egemenlik de bu istekdedir. Bu qonuya daha sonra da doxunacayıq.
Bize göre İran düşüncesi Azerbaycan düşüncesi ile qarşı qarşıyadır. Buna göre de, onların gördüğü her iş, danışdığı her söz, ve yazdığı her yazı bize ters gelemekdedir. İran Fars ırqçılığı özünü öbiri topluluqları eşağalatmda ve onlarla düşmanlıqda görür. Fars'ın milli varlığı Türk ve Ereb düşmanlığı üzerine qurulmuşdur. Milletlere düşmanlıq üzerine qurulmuş olan miletçilik hemen hemen ırqçılıqdır ve başqalarını yox etmeğe ve özünü de yox etmeğe geder. Bize göre Fars ve sonucda İran milletçılığı axsaq ve iflas edici bir düşüncedir. Bu İran-Fars ırqçılığı her halda, bizi yoxedici olduğu yanısıra, Fars milletine de yaramayacaqdır. Bu çeşit milletçilik (ırqçılıq)ların sonu ve tecrübesi tarixde ap açıq aydındır. Bize göre bu İran-Fars düşüncesi yuxarıda anlatdığım nedenlere göre, ve öz genel neceliğine göre yalnış yoldadır. Men, İran-Fars düşüncesinin puça çıxacağına ve bu anti-Türk ve anti-Ereb kökdenci yaxlaşım onların üzlerine patlayacağına eminem. Azerbaycan düşüncesinin önünde, İran düşüncesi, bizim qurtarıcı çalışmalarımızla her gün geri oturur ve silinib getmekdedir.

Oğuz Türk
2013