سوزده (ياشيل حرکت) و گونئي آزربايجان ملي حرکتي
گهنهلليکده فارسيستاندا و ايران آدلانان اولکهنين مستعمره يئرلهرينده، هم حاکميتده اولان اسلامچي فاشيستلهر، هم یاشيل پانايرانيستلهر صبرسيزليکله ۲۲بهمني گوزلهييرلهر
بو بير سيککهنين ايکي اوزلهري بير بيرلهرينه ههدهقورخو گهليب ميدان قيزيشديريرلار کي…. کيمسه اسارتده اولان گونئي آزربايجاني دانيشماسين. سياستدهن دانيشماق ايستهيهن بويورسون مسئله: ايران. آزربايجان يوخ، ايران گوندهمده اولسون. دونهنکي جلادلار بوگونکي جلادلارين پاسين آچير، بو گونکي جلادلار دا دونهنکي جلادلارين توزون آلير.
بو گورونوشده بير بيرينه قارشي دوران آما گهرچهکده آماجلاري بير اولان بو ايکي قوروپ، گونئي آزربايجانين فارسيستانين مستعمرهسي قالماقدا بيرگه دوشونورلهر. گهلين ياشيل ايرانچي فاشيستلهرين و اسلامچي فاشيستلهرين بيرلهشديگي يئرلهره باخاق. هر ايکي طرفه گوره ايران تاريخ بويو و هر زامان بير بوتون اولموش و بولونمهز پارچالانماز بير بوتوندور. بوتون قافقازلار و گونئي آزربايجان هر زامان بويوک ايرانين بير پارچاسي اولموش و کفايتسيز قاجارلار او توپراقلاري اهلدهن وئرميشلهر. ارمنيستان خارج، قاجارلارين اوتوزدوقلاري توپراقلار آنا وطن ايرانا گهري قايتاريلماليديرلار. ههلهليک بولگهنين دورومو اويقون اولماديغينا گوره و اوستهليک ايرانين يئتهرينجه اوردو گوجو اولماديغينا گوره، ايرانين شيعه و فارس کولتور اوردوسو ايران شمالي دييلهن يئرلهرده يوغون چابا گوستهريرلهر. آزربايجان جمهوريتي سوزونون يئرينه ايران شمالي، باکو، آزربايجان شوروي، جمهوري صهيونيستي آزربايجان دييرلهر. قاراباغ و اطرافينداکي ايالتلهرين ايشقالي و آزربايجان تورکلهرينين قتل عامي و بير ميليون تورکون سورگونلوگو دانيشيلماماليدير. يئرينه فيليستينليلهرين اسرائيلله بوغوشمالاريندان دانيشيلماليدير. نه ياشيل فاشيستلهرين نه ده قارا فاشيستلهرين دوشونورلهري و بويوکلهري هيچ زامان قوزئي آزربايجانين مظلوميتندهن يانا دانيشماميشلار. تهرسينه هاميسي و هر زامان آزربايجانا قارشي سياستلهر گودموشلهر. هر ايکي طرف هر زامان ايشقالچي ايرمنيستانا سياسي استراتژيک لوژستيک و نظامي يارديم ائتميشلهر. گئچميش ۳۰ ايلده رفسنجاني،منتظري، مير حسين موسوي، خاتمي،اعلمي، ابطحي، کروبي، سازگارا، فروهر، مهاجراني، نبوي، عطريانفر،…. و بوتون اوزلهريني ليبرال ويا اصلاح طلب آدلانديران سياسيلهر هيچ بير زامان آزربايجان تورکلهرينين ميللي منفعتلهرينه يونهليک بيرجه سوز ده ائتمهميشلهر. ها بئله خميني، بهشتي، باهنر، شريعتمداري (کيهان)، حداد عادل، خامنهاي، احمدينژاد، جنتي، يزدي،…… و بوتون اوزلهريني کوکدهنجي و اصولگرا آدلانديران سياسيلهر ده هيچ زامان آزربايجان تورکونو اهزمهکدهن چهکينمهميشلهر. هر ايکي طرف ده آزربايجان تورکونون وارليغيني رسميته تانيميرلار و بيزه ترکزبان يا آذريزبانلار دييه تانييرلار. ايکي طرف ده گونئي آزربايجان توپراقلارينين گيلان، گلستان، همدان، زنجان، مرکزي، تهران، و کردستان ايالتلهرينه تجزيهسيندهن يانا اولموشلار. ايکي طرف ده گونئي آزربايجان تورکونون تورکسوزلهشمهسينده، فارسلاشماسيندا و اسيميلاسيونوندا بويوک چابالار گوستهرميشلهر. ايکي طرفين ده اهللري گونئي آزربايجان تورکونون قانيلان بوياليدير.
هم ياشيل پانايرانيستلهرين ، هم ده اسلامچي فاشيستلهرين ايچينده تورک کوکهنليلهرين اوراني آز دئييل. آنجاق بو قونو بيزي آلداتماماليدير. البته اوزلهريني تورک بيلمهيهن و تورک سياسي، اقتصادي و فرهنگي منفعتلهري يونونده چاليشمايان تورک دئييلدير. البته خامنهاي، موسوي، اعلمي، گوگوش، فرح،تقيزاده، بنيصدر، کسروي، اراني، ……………..و کوروشون لاپ اوز نوهسي اولان شيرين عبادييه تورک دئيهن، يا تورکون آنلاميني بيلمير يا دا تورکه تحقير غرضي وار. دئمهک يالنيز تورک اولماق اونهملي دئييل. اوزونو تورک بيلمهک و تورک منفعتلهريني آنلاييب يولوندا چاليشماق اونهمليدير. بويوک آتاتورکون سوزو بو قونودا بيزه اوندهردير: نه موتلو تورکهم دييهنه
پان ايرانيست لهر ۸۰ ايل گونئي آزربايجان تورکونو فارسلاشديراندان سونرا بيزي راحاتجا مخاطب آلابيليرلهر. ايندي چوخونلوق فارسجا آنلايير يا دانيشابيلير. گونئي آزربايجان تورکو فارس مرکزلي آلانلارين يالنيش بيلگي بمباردماني آلتيندا دوغرونو اهيريدن و دوستو دوشماندان سئچه بيلمير. بو آز دئيلميش کيمين، فارس مئنتاليتهسينه و ايرانچيليغا اويان تورکجه دانيشان مانقوتلار دا گونئي آزربايجان تورکونو راحات بوراخميرلار. هرگون يئني بير توزاق قوروب گونئي آزربايجان تورکونو اوز يولوندان ائتمهگه چاليشيرلار. ايرانين ايشقالي آلتيندا، اسارتده و مستعمره دوروموندا سورونهن گونئي آزربايجان تورکونون يولو اونون اوزگورلوگو و اسارهتدهن قورتولوشودور.
گونئي آزربايجان تورکونون گهلهجهيي و سعادت يولو فارس ايرقچيليغين، گئنيشچيليگين،ايشقالچيليغين و شونيسمينين و اونلارين اينديکي نمايندهسي اولان ايران ايسلام جمهوريسينين اسارهتيندهن قورتولماق و اوز باغيمسيزليغينا يئتيشمهکدير. آنجاق گونئي آزربايجان تورکونو اوز نورمال و دوغال گهلهجهييندهن چاشديرماق ايستهيهن تورک ديلينده دانيشيب يازانلار بيزيم ايچيميزده دشمانين آغزي رولونو اويناييرلار. ايلک اونجهسيندهن وورقولاديغيميز کيمين، ايرانين بير قوجاق دردلهرينين اهن باشيندا گهلهن درد گونئي آزربايجان مسئلهسيدير. آزربايجان جمهوريتينين يئنيدهن قورولماسيندان سونرا بو مسئله ايرانين سويلهنيلمهميش اهن بويوک مسئلهسيدير. گونئي آزربايجان مسئلهسي هم ايرانين هم ده بوتون بولگهنين اهن اونهملي مسئلهسيدير. بو مسئلهني چوزمهک اوچون هر طورلو پروژه اويقولانير و اويقولانماغا حاضردير. ايرانچيلارين اهن سون اويونو اولان بو سئچيم آلداتماجاسي اهن بهللي اورنهکدير.
ياشيل پانايرانيستلهر و ايسلامچي فاشيستلهر بو معرکهده گونئي آزربايجان تورکونو اوز قويروقلارينا ساليب و ايرانين سياسي اقتصادي و کولتورهل اسارهتي برهوتوندا سرگردان ائتمهيي آماج آلميشلار. گونئي آزربايجان تورکونون ساغ دويوسو و سياسي شعورو اونو بو توزاغا و تلهيه دوشمهکدهن اوزاق توتموشدور. او هر ايکي طرفه ده بير بويوک يوخ دئميشدير. اونا گوره هر ايکي طرف آزربايجانين اسارتي اوزهرينه آند ايچميشلهر. او هاراي هاراي من تورکهم دئيير. او اوز گهلهجهييني ايراندان آييرميشدير. گونئي آزربايجان تورکونون سوزو بهلليدير. او بير داها ايرانا قوربان وئرمهيهجهک، قوربان گئتمهيهجهک. اونون دوشماني نه جمهوريتدير نه ايسلام، اونون دوشماني ايران و ايرانچيلاردير.
گونئي آزربايجان تورکو ۲۲بهمن سوزده انقلاب گونونده ايرانا و ايرانچيلارا شعار وئرمهيهجهک. او قاجارلار، مشروطه، آزاديستان، ميللي حکومت، و خلق مسلمان تجربهلهريندهن درس آلاراق بير داها ايران سالاخخانالاريندا يوزمينلهرجه قوربان وئرمهيهجهک. گئچميش ۸۰ ايلين تجربهسي گوستهرير کي ايرانچيلارا گوره ايران وطنداشي اولاراق گونئي آزربايجان تورکونون وظيفهسي يالنيز اولمهکدير. يا ساواشدا يا زيندانلاردا. اونون گونئي آزربايجان تورکو اولاراق وارليق حقي يوخدور. او يالنيز ايران اوچون اولمهيه هر زامان حاضر اولان غيرتلي و شرفلي غيور آذريزباندير. بو اويونلارا آييق اولان گونئي آزربايجان تورکو بير داها ايرانچيلارين اويونونا گهلمهيهجهک. او ايرانچيليغين ياشيلينا دا قاراسينا دا آلدانماياجاق.
گونئي آزربايجان تورکو ۲۲ بهمن معرکهسينده، هر زامانکي کيمين اوز آل بايراقلاريلا اوز شعارلاريلا اوز وارليغيني اورتايا قوياجاق. چوخ اونهملي اولان بير دهيهرلهنديرمهيي ده بوردا گهتيرمهيي يارارلي گورورهم. حکومتين چوخونلوق گوجو و ديقتي تهران و فارسيستان اوزهريندهايکهن، گونئي آزربايجان تورکو بوتون گوجويله خيابانا چيخيب اوز يولونو داها دا آيدين اولاراق ايراندان و ايرانچيلاردان آييرسين.
اوغوز تورک
2010
No comments:
Post a Comment